बाजुरा : बाजुराका आलोक थापाको धनगढीमा देहावसान भएको छ । आज (शनिबार) थापाको धनगढी स्थित मायामेट्रो अस्पतालमा ज्यान गएको हो ।
जिल्ला प्रहरी कार्यालय कैलालीका अनुसार २६ वर्षीय थापा करिब ३ वर्षदेखि बैयाबेहडीस्थित आफ्नो ससुरालीमा बस्दै आएका थिए । हिजोमात्रै उनी आफ्नो भतिजाको घर जन्मदिन मनाउन भनेर गएका थिए ।
भतिजाको जन्मदिन मनाएर फर्किएपछि सुतेका थापा बिहान बेहोस अवस्थामा फेला परेका थिए।त्यसपछि उपचारका लागि अस्पताल लगिएकोमा उनलाई मायामेट्रो अस्पतालका चिकित्सकले मृत घोषणा गरेको थिए । थापाले विष सेवन गरेको हुन सक्ने अनुमान गरिएको छ ।
उनको शव पोस्टमार्टमका लागि सेती अस्पतालमा राखिएको र घटनाको थप अनुसन्धान भैरहेको प्रहरीले जनाएको छ । थापा बुढीगंगा नगरपालिका ६ का स्थायी बासिन्दा हुन् । लामो समयदेखि पढाइको शिलशिलामा धनगढी ससुराली घर बस्दै आएका थिए ।
राष्ट्रिय युवासंघ नेपाल बुढीगंगा नगर कमिटी सदस्य समेत रहेका थापा युवा पीडामा चर्चित थिए । केही गरौं भन्ने स्वभावका युवालाई छिटै सदाका लागि विदाई गर्नु साह्रै पीडादायी क्षण भएको युवा संघ बाजुराले वक्तव्य मार्फत भनेको छ ।
युवा संघले शोक मार्फत दुख व्यक्त गरेको छ । एक सहयोद्धा गुमाउनु पर्दा पीडा बोध भएको युवा संघका सचिव विष्ण कार्कीले बताएका छन् । युवा संघले संगठनको एक कुशल र सक्षम युवा गुमाउनु पर्दा ठूलो क्षति भएको बताएको छ ।
प्रतिक्रिया दिनुहोस