बाजुरा : हिमाली गाउँपालिकाको केन्द्र धुलाचौरमा शीत भण्डार गृह निर्माणको काम अन्तिम चरणमा पुगेको छ । कृषकहरुको बारीबाट उत्पादन हुने खाद्य बस्तुको भण्डारणका लागि बनाउन शीत भण्डारी गृह निर्माण गर्न लागिएको हो ।
राष्ट्रिय गौरवको आयोजना अन्तर्गत गाउँपालिकाको केन्द्र धुलाचौरमा करिव २ करोडको लगानिमा निर्माण हुन् लागेको शीत भण्डार गृह निर्माणको काम अन्तिम चरणमा पुगेको गाउँपालिकाले जनाएको छ ।
गाउँपालिकाको १ करोड, प्रदेश र संघ अन्तरगतको १ करोड गरि करिव २ करोडको लागतमा ह्याण्डिक निर्माण सेवा कम्पनि काठमाण्डौले उक्त शीत भण्डार गृह निर्माणको काम गरिरहेको गाउँपालिकाका निमित्त प्रमुख प्रशासकिय अधिकृत राजबहादुर भण्डारीले बताएका छन् ।
पालिकाभित्रका कृषकहरुले स्थानिय स्तरमा उत्पादन गरेका खाद्य वस्तुहरुको बजारीकरणमा सहजता ल्याउन शित भण्डार गृह निर्माण गरिएको हो । निर्माण सम्पन्न पछि २० मेट्रिक टन कृषि उपज भण्डारण गर्न सकिने भएको छ ।
गाउँपालिकाले पालिका भित्रको खाद्य सूरक्षाका लागि मात्रै चालु आर्थिक वर्षमा १ करोड रकम विनियोजन गरेको छ । त्यस्तै गाउँपालिकाले यसै वर्षभित्र पालिकाका कृषकहरुले उत्पादन गरेको खाद्य वस्तुलाइ बजारसम्म पुर्याउनका लागि कृषि एम्वुलेन्स समेत खरिद गर्न लागेको निमित्त प्रमुख प्रशासकीय अधिकृत भण्डारीले बताएका छन् ।
गाउँपालिकामा स्याउ, सुन्तला, कागति, ओखर, नास्पति लगायतका करिव ५० हजार बोट विरुवाहरु हुक्रिरहेका छन् । गाउँपालिकाले पालिका भित्रका कृषकहरुलाई कृषि खेतिमा आत्मनिर्भर बनाउन १ रुख रोपे बाफत ५ केजि चामल समेत दिदै आएको छ ।
पालिकामै शित भण्डार गृह बनेपछी स्थानियहरुले स्थानिय स्थरमा उप्पादन गरेको बस्तु किसानले अर्कों ठाँउमा निर्यात गर्न सक्ने र फलफुल तथा तरकारी खेर जाने बाध्यताको अन्त्य हुनेछ ।
बीउका लागि उत्पादन भएका वस्तु घरमा राखेर सम्भव नहुने र गाउँपालिकाको केन्द्र धुलाचौरमा शीत भण्डार निर्माण भएपछि किसानलाई फाइदा पुग्ने भएको छ । यो सँगै स्थानिय स्तरमा उत्पादन भएका तरकारी भण्डारण गरी बजारीकरण गर्न सकिने र सिजनमा उत्पादित तरकारी तथा फलफुलले राम्रो बजार पाउनेमा गाउँपालिका विश्वस्त रहेको छ ।
सिजनमा क्विन्टलको हिसाबले उत्पादन हुने आलु र प्याज बजारको मूल्य निकै कम हुँदा लागत उठाउन समस्या हुने गरेको थियो । भण्डारण गरेर पछि बिक्री गर्दा राम्रो आम्दानी गर्न सकिने कृषकहरुले बताएका छन् । शीत गृह भण्डार निर्माण भएपछी किसानलाई सहज हुने गाउँपालिका अध्यक्ष गोबिन्द बहादुर मल्लले बताएका छन् ।
आगामी केही महिना भित्र शीत भण्डार निर्माण कार्य सम्पन्न भैसकेपछि व्यवसायिक रुपमा कृषि कर्म गर्दै आएका किसानलाई सहज हुने भएको छ । किसानले शीत भण्डारबाट मौसममा उत्पादन गरेका वस्तुलाई बेमौसमको समयमा राम्रो र उचित मुल्यमा बिक्री गर्न सक्ने सम्भावना रहेकोे छ । कृषि र पर्यटन क्षेत्र प्रमुख स्रोतका रुपमा रहेकाले यसको संरक्षण र प्रवर्द्धनमा गाउँपालिकाको सहयोेग रहने गाउँपालिका अध्यक्ष मल्लले बताए ।
गाउँपालिकाले कृषि र पर्यटन क्षेत्रमा विशेष प्राथमिकताका साथ लगानी गरिरहेको छ । कृषि क्षेत्रबाट पालिकालाई समृद्ध बनाउनका लागि निरन्तर लागिरहेको गाउँपालिकाका अध्यक्ष मल्लले बताएका छन् ।
प्रतिक्रिया दिनुहोस