बाजुरा– जेन–जिको आन्दोलनमा बाजुराका युवाहरूले ऐक्यवद्धता जनाउँदै सदरमुकाम मार्तडीमा आन्दोलनको सुरुवात गरेका छन् । मंगलवार बिहान १० बजेदेखि नेपाल टेलिकम कार्यालय परिसर अगाडिबाट शान्तिपूर्ण आन्दोलन सुरु गरेका हुन। सामाजिक सञ्जाल बन्द गरिएको र अभिव्यक्ति स्वतन्त्रतामाथि सरकारले अंकुश लगाएको आरोप लगाउँदै उनीहरू आन्दोलनमा उत्रिएका छन् ।
युवा आन्दोलनमा संलग्न युवाहरूले शान्तिपूर्ण तर दृढ स्वरमा आफ्नो माग प्रस्तुत गर्ने तयारी गरेका छन् । उनीहरूले तोडफोड वा हिंसात्मक गतिविधि नगरी कानुनी दायराभित्र रहेर विरोध गर्ने बताएका छन् । “हामीलाई हिंसाबाट होइन, आवाजबाट परिवर्तन चाहिएको हो । त्यसैले सडकमा शान्तिपूर्ण रूपमा उपस्थित भएर अन्याय विरुद्ध बोल्छौं,” एक आन्दोलनकारी युवाले भने । बाजुरा जिल्लाका युवाहरूले आफूहरूले भोगिरहेको बेरोजगारी, भ्रष्टाचार, शिक्षा र स्वास्थ्यमा भएको चरम लापरबाही, तथा जनताको आवाज सुन्ने सरकारी इच्छाशक्तिको कमी नै आन्दोलनमा उत्रिनुको प्रमुख कारण भएको बताएका छन् ।
हालै सरकारले सामाजिक सञ्जाल बन्द गरेपछि विशेषगरी विद्यार्थी र जागिर खोज्ने युवाहरू बढी प्रभावित भएका छन् । “सामाजिक सञ्जाल हाम्रो पुस्ताको आवाज उठाउने प्रमुख माध्यम हो । त्यसलाई बन्द गर्नु भनेको हाम्रो घाँटी थिच्ने प्रयास हो,” अर्का युवाले आक्रोश पोख्दै भने । नेपाल टेलिकम बाजुरा कार्यालय अगाडिबाट सूरुवात भएको प्रदर्शन बजार प्ररिक्रमा गरि खुलामंचबाट फर्केर लोकतान्त्रीक चोकमा कोडसभाको आयोजना गरेको छ । आयोजकले स्थानीय प्रशासनलाई औपचारिक जानकारी गराइसकेका छन् । जिल्ला प्रशासन कार्यालयले शान्ति सुरक्षा कायम गर्ने प्रतिबद्धता जनाएको छ भने आयोजक पक्षले कुनै अव्यवस्था नगर्ने प्रतिवद्धता जनाएको छन ।
जेन–जिको नेतृत्वमा सुरु भएको आन्दोलन अहिले देशभर फैलिँदै गएको छ । काठमाडौं, पोखरा, विराटनगर, नेपालगञ्जलगायत ठूला शहरमा भएको प्रदर्शनसँगै ग्रामीण जिल्लाहरूबाट पनि समर्थन आउन थालेको हो । बाजुराका युवाहरूले दिएको समर्थनले यो आन्दोलनलाई अझै सशक्त बनाउने बताएका छन । राजनीतिक विश्लेषकहरू भन्छन्, “यो आन्दोलन अब केवल शहरी क्षेत्रमा सीमित छैन । ग्रामीण जिल्ला, विशेष गरी बाजुरा जस्ता पराधीन र अविकसित क्षेत्रका युवाले ऐक्यवद्धता जनाउनु आन्दोलनको दायरा फराकिलो भएको संकेत हो ।”
बाजुरामा हुने भनिएको शान्तिपूर्ण प्रदर्शनबारे सर्वसाधारणमा पनि चासो बढेको छ । कतिपयले युवाको कदमलाई सकारात्मक भन्दै समर्थन गरेका छन् भने कतिपयले आन्दोलन दीर्घकालीन समाधान दिन सक्दैन भन्ने चिन्ता व्यक्त गरेका छन् । तर, अधिकांश अभिभावकले भने आफ्नो छोराछोरी सचेत बनेर शान्तिपूर्ण तरिकाले देशको हितका लागि आवाज उठाउन थालेकोमा खुशी व्यक्त गरेका छन् ।
जेन–जिको आन्दोलनलाई बाजुराका युवाले समर्थन गर्ने घोषणासँगै यो आन्दोलन अब केवल एक पुस्ताको असन्तोष मात्र नभई राष्ट्रिय स्तरको चुनौतीका रूपमा देखा पर्न थालेको बताएका छन । बेरोजगारी, भ्रष्टाचार र असमानताले पीडित गाउँ–गाउँका युवा सडकमा उत्रिन बाध्य सरकारबाटै भएको उनिहरुको भनाई रहेको छ ।
प्रतिक्रिया दिनुहोस