धनगढी : नेकपा एमाले सुदूरपश्चिम प्रदेश प्रचार तथा प्रकाशन विभागले प्रकाशन गरेको ‘सूर्य युग’ मुखपत्रको विमोचन गरिएको छ । धनगढी स्थित नेकपा एमाले प्रदेश पार्टी कार्यालयमा औपचारिक कार्यक्रमका बीच ‘सूर्य युग’ मुखपत्रको विमोचन गरिएको हो ।
मुखपत्रको विमोचन नेकपा एमाले पार्टी केन्द्रीय सचिव एवं प्रदेश इन्चार्ज लेखराज भट्टले गरेका हुन् । एमालेको विचार जनस्तरसम्म लैजान र पार्टी कमिटीका गतिविधीलाई लिपिवद्ध गर्ने गरि पत्रिका प्रकाशन थालिएको एमाले प्रदेश उपसचिव समेत रहेकी प्रचार तथा प्रकाशन विभाग प्रमुख भागरथी विष्टले बताएकी छन् ।
पार्टी प्रदेश कमिटी मुख पत्रकै रुपमा प्रकाशित हुने गरि ‘सूर्य युग’ मुखपत्र प्रकाशन थालिएको हो । विचार देखि समाचारसम्म, पार्टी गतिविधी देखि योजनालाई समेत मुखपत्र मार्फत सार्वजनिक गरिने प्रचार तथा प्रकाशन विभागका उपप्रमुख मातृका तिमिल्सेनाले जानकारी दिए ।
विमोचन कार्यक्रममा प्रमुख अतिथि बनेका एमाले सचिव लेखराज भट्टले पार्टीको विचारलाई जनस्तरमा स्थापित गर्ने गरि ‘सूर्य युग’ मुखपत्रले भूमिका निर्वाह गर्न सुझाव दिए । प्रदेशको स्रोत साधनको पहिचानमार्फत सुदूरपश्चिमलाई समृद्ध बनाउने पार्टी लक्ष्यलाई नै मुल ध्यय बनाएर मुखपत्रलाई प्रकाशित गर्नुपर्नेमा उनको जोड थियो ।
भट्ट पछिल्लो समय पार्टी भित्रको एकता र समृद्धि केन्द्रीय विषयलाई प्रमुख मुद्दा बनाएर बोल्दै आएका छन् । उनले सुदूरपश्चिम प्रदेशलाई संमृद्ध र विकसित बनाउने अभियानमा सबैले संयुक्त पहल हुनु पर्ने बताए ।
‘सुदूरपश्चिमलाई सबैभन्दा विकसित प्रदेश बनाउने हाम्रो लक्ष्य हो, सबै मिलेर यो लक्ष्य हासिल गर्नुपर्छ’, भट्टले भने । यो सुदूरपश्चिम होइन्, सुन्दर पश्चिम हो, सुन्दरतालाई नै समृद्धिको ताज पहिरिनु पर्ने उनको धारणा छ ।
उनले पार्टीभित्र देखिएको देखावटी एकताको आलोचना समेत गरे । आन्तरिक गुटबन्दी अन्त्य गरी संगठनात्मक एकता र रुपान्तरणको बाटो अँगाल्नुपर्ने आवश्यकता रहेको बताएका भट्टले समृद्धि र पार्टी एकता प्रमुख एजेण्डा र मुद्दा बन्नु पर्नेमा जोड दिए ।
आगामी निर्वाचनमा पार्टीलाई बलियो बनाउन सबै कार्यकर्तालाई एकजुट भएर लाग्न आग्रह गरेका भट्ट यो वा त्यो कुनै बाहनामा पनि नेता कार्यकर्ता विभाजित हुने र विभाजन ल्याउने छुट कसैसँग नभएको बताए ।
कार्यक्रममा नेकपा एमालेका केन्द्रीय सदस्य तथा अछाम इञ्चार्ज झपट बोहराले पार्टीको आन्तरिक जीवनमा मुखपत्रको महत्वपूर्ण भूमिका रहेको बताए । उनले सूर्य युग ले राजनीतिक चेतना र विकासको गतिविधि जनतासम्म पुर्याउने विश्वास व्यक्त गरे । ‘मुखपत्र सबै जिल्लामा पुर्याउनु पर्ने सुझाव उनको थियो ।
प्रदेश अध्यक्ष कृष्णप्रसाद जैशीले पहिलो प्रयास सकारात्मक रहेको उल्लेख गर्दै पत्रिकालाई अझ उत्कृष्ट बनाइने बताए । सचिव रणबहादुर चन्दले पार्टी गतिविधिलाई सार्वजनिक गर्न मुखपत्र प्रकाशन गरिएको जानकारी दिँदै यसलाई निरन्तरता दिइने बताए ।
प्रचार तथा प्रकाशन विभाग प्रमुख भागरथी विष्टले विभाग गठनपछि नीति, योजना र सिद्धान्तलाई आम कार्यकर्ता र पाठकसम्म पुर्याउने उद्देश्यले मुखपत्र सुरु गरिएको बताइन् । साथै, उनले अनलाइन पोर्टल र युट्युब च्यानल सुरु गर्ने योजना रहेको समेत जानकारी गराइन् ।
प्रदेश कमिटी सदस्य तथा विभाग उपप्रमुख मातृका प्रसाद तिमिल्सेनाले सूर्य युग पत्रिका लामो प्रयासपछि सुरु गरिएको बताउँदै यसले पार्टीको नीति र कार्यक्रम जनतासम्म पु¥याउने बताए। आगामी दिनमा मुखपत्रलाई अझ परिस्कृत बनाइने उनको भनाइ थियो । कार्यक्रम पार्टी कार्यालयमा आयोजना गरिएको थियो ।
प्रतिक्रिया दिनुहोस